Great Greenlandip Kina naatsorsuutigaa

Kinami tuniniaaviit pilerinaqalutik Great Greenlandimi amernik tuniniaasartut qammarpaat.
oktobarip 16-at 2015 05:08

Qaninniarnerli ajornaatsuinnaanngilaq, Kinamiut Great Greenland taassumalu pisortaa, Lars Berg, arlaleriarluni pakatsisittarsimavaat pisiffiginngitsoortarlugu. 

Suliffeqarfilli Naalakkersuisut peqatigalugit Kinamut tunisassianik pilerisaariartorlutik misileeqqinnialerpoq. 
Great Greenlandip North Atlantic Group puisit amiinik Kinami tuniniaasussatut suleqasiukkamiuk neriulluarsimaqaaq. 

Aamma atuaruk Kukkunersiuisut: Nalunaarut mianersortumik tiguneqartariaqarpoq

Kinamili tuniniaanissarsuarmik takorluugaq allatorluinnaq inerneqarpoq. Eqqartuussivilersuussineq aqqummi ilaavoq. Great Greenlandillu puisip amiutini Danmarkimiittut 70.000-it annaavai. 

-Suleqatigiinnerput 2013-mi aserormat kingorna ilungersunartorsiorpugut, Kinamilu pisiniat tassanilu niuerfinni angusavut allat tamaasa annaavagut, Great Greenlandip pisortaa Lars Berg oqarpoq.

Tassami Kinami suliat tamaasa North Atlantic Groupip isumagigaluarpai.

 

Copenhagen Fur

Taama pisoqareermat Great Greenlandip Copenhagen Fur, Kinami tuniniagaqarfigissaalereertoq, suleqatigilerpaa.

- Taakkuali amernik tuniniaanermi pikkorissorsuugaluarlutik, isikkulersuinermik ilinniarfiliorsimagaluarlutik allanillu Kinami suliaqarsimagaluarlutik aamma aallartisarnerminni ajornakusoortitsisimaqaat.

Aamma atuaruk NAFGip Great Greenlandip unnerluutaa akerlilerpaa

Tassalu Kinap amminik tuniniaaviinut attaveqaqqilernissaq Great Greenlandimut ajornakusoorsimasoq, Lars Berg oqarpoq. 

Taassuma neriuutigaa maanna tuniniaajartorlutik angalanissartik iluaqutaassasoq, suliffeqarfiullu pisiassaataanik nittarsaannissamut periarfissatsialattut isigalugu.

 

Unamminartoq

Aammali  unamminarpoq, ammit Danmarkimi uninngasuutit  70.000-it annaasimagamikkit, taamaalillutillu Kinami tunisaat ikippallaalerlutik. 

Kinamimi ammit piumasaat ima amerlatigaat, allaat malinnaaffigiuminaallutik, taamaammallu taqqavani tuniniaanissarsuarmi Great Greenlandip ukiuni tulliuttuni amernik qanoq amerlatigisunik pissarsisinnaanera apeqqutaalluinnarpoq. 

Naallu unammilligassaq nuannersutut nipeqaraluartoq, naammattunik amiuteqanngikkaanni pisiniat takkutinngitsuuissinnaasut, Lars Berg nassuiaavoq.

- Tassalu Kinami pisisartut tunuarsimaarsimasinnarlutik piserusunnerulernissaannut maanna utaqqiinnarpugut, Great Greenlandip pisortaa Lars Berg oqarpoq.