Timmisartuussinissat silarlunnerata kinguarsarpai
Silap ajorneranik pissuteqartumik Nuummit, Paamiunit aamma Maniitsumit timmisartuussinissat kinguarsarneqarput. Ullumikkut ippassarlu timmisartuussinissaagaluanut ilaasussat timmisartuunneqarnissaat arfininngornermut nuunneqarput.
Allattoq Aaqqissuisoqarfik / Redaktionen
oktobarip 15-at 2015 12:15
Avannaani Kujataanilu sila ajunnginnerumaarpoq, taamattumik ullormut timmisartuussinissanut pilersaarutit ingerlanneqarnissaat naatsorsuutigineqarpoq. Air Greenland tusagassiorfinnut nalunaaruteqarluni taama allappoq.
Ilaasussat kinguaattoornermit eqqorneqartut arfininngorpat apuuffissaannut apuunniarlugit periarfissat tamaasa atorneqassapput – taamaaliornikkut ilaasussat silap ajornera pissutigalugu eqqorneqartut apuuffissaminnut arfininngorpat apuunnissaat naatsorsuutigineqarpoq.
Ilaasussaagaluit angalanissamik allannguutaat pillugit smsikkut, mailikkut imaluunniit sianerfigalugit ilisimatinneqartut timmisartuutileqatigiiffik nalunaarpoq.
Aamma malinnaasoqarsinnaavoq, ugguuna www.airgreenland.gl.
