Atassutip inuusuttai: Naartuersinnerit akeqalerlik

Kinaluunniit naartuersikkuni naartuersinnerup akiata fem procentia akilertassavaa, Atassutip inuusuttaasa siulittaasua, Masauna Peary taama isumaqarpoq.
septembarip 28-at 2015 12:00

Ukiumut naartuersittarnerit amerlassusaat 2000-kkut aallartinneraniilli allannguuteqanngillat, agguaqatigiisillugu arnat ukiumut  800-ut sinnillit naartuersittarlutik.

Atassutip inuusuttaat isumaqarput, naartuersittarnerit akeqalertuuppata Nunatta karsianut imaqanngitsumut tamanna iluaqutaassagaluartoq.

- Atassutip inuusuttaasa piffissanngorsorivaat naartuersittarnerit akiata 5 procentimik, imaluunnit annerusumik minnerusumilluunniit naartuersittarneq akeqalernissaa inuiaqatigiini oqallisigineqalernissaa piffissanngortoq, Atassutip inuusuttaasa siulittaasuat, Masauna Peary taama oqarpoq.

Naartuersittarnerit inuiaqatigiinnut ullumikkut qanoq annertutigisumik aningaasartuutaasarnersut kisitsisaatigineqanngilaq. 2009-mili §37 naapertorlugu apeqquteqaammut akissummi eqqoriarneqarpoq, naartuersinnerit 900-t missaanniittut 5,2 millioner koruuninik akeqarsimanissaat. Kisitsisilli taakku Danmarkimi naartuersinnerup ataatsip akeqarneranut missingersuutit malillugit kisinneqarsimallutik.

Aamma atuaruk VIDEO Ernisussiortup naartuersittarneq pinaveersaartinniarlugu angajoqqaat peqatiserai

Masauna Pearyllu siunnersuutaa atuutsinneqalerpat, tassa naartuersinnermi akigitinneqartartup fem procentianik akeqartitsilernermi, tamanna nunatta karsianut ukiumut 250.000 koruuninik isertitsissutaasalissagaluarpoq.

Taamali amerlatigisunik isertitsissutaasalernissaa nalorninarpoq aamma aningaasartuutaasartut qanoq annertutiginersut atassutip inuusuttaasa ilisimanngilaat.

- Aningaasat qanoq amerlatiginersut taasinnaangilagut, pissutigalugu piffinniit piffinnut naartuersinnerup akia nikerarsinnaasoq ilisimakanneratsigut. Kisiannilu annerusumik ilisimasaqarfiginagu.

Ukiumut naartuersittartut suli ullumikkut amerlavallaarput, tassa arnat 800-t sinneqartut ukiut tamaasa naartuersittarmata.

Aamma atuaruk Naartusut marluugaangata aappaa naartuersittarpoq

Naartuersinnerup akiata affaanik akiliuteqartalernissaq Atassutip inuusuttaannik siunertarineqanngilaq. Tamanna tunngaveqarpoq, Nunatsinni SIK-p isumaqatigiissutai malillugit akissarsiallit, tassa akissarsiakinnerpaat amerlammata.

-Nunatsinni nalunngisarput malillugu SIK-p isumaqatigiissutaanik naapertorlugu isertitaqartut amerlanerpaapput, taamaattumik siunnersuutigivarput oqarluta akissarsiaqannginerusut akilersinnaasaaniik siunnersuuteqassalluta, atassutip inuusuttaasa siulittaasuat, Masauna Peary taama oqarpoq.

Aamma atuaruk Naartuersittarnerpassuit Dorisip ikilisikkusuppai