Ruslandip Qalasersuarmik piumasaqaataa Canadamiut suli qisuariarfiginngilaat
Rob Hubert, issittumi pissutsinik immikkut ilisimasalik, tusagassiorfimmut Canadian Pressimut oqarpoq ajornartorsiutip qaangerniarnissaanut naalagaaffiit isumaqatigiinniarnissaat kisiat aqqutissaassasoq.
Tamannali Canadap ilungersunartipilussuarmik inissinneranik kinguneqarsinnaavoq, Canadammi Ruslandip Ukrainimi sakkutuulersornera Krimimillu tiguaanera sakkortuupilussuarmik pisortatigoortumillu isornartorsiorsimavaa. Canadalu nunat tamalaat akornanni Ruslandimik isornartorsiuisut sallersaasut aamma ilagivaat.
AAMMA ATUARUK Danskit tusagassiorfii: Russit piumasaqaataat Danmarkimut nalunaarnertut isigisassaavoq
Taamaammat Ruslandimik isornartorsiuitigaluni Issittumut tunngatillugu Ruslandimut attaveqarniarnissaa ajornakusoorsinnaavoq.
Canadamullu maannakkut pitsaanerpaassaaq utaqqimaaqqaarallaruni, piumasaqaatimmi assigiinngitsut Naalagaaffiit Peqatigiinni suliarineqarnissaat aatsaat ukiut qulit imaluunniit sivisunerusoq qaangiuppat suliarineqarnissaat naatsorsuutigineqarmat, Rob Hubert Canadian Pressimut taama oqarpoq.
