Terry Audla nalunaarusiaq pillugu: Neriorsuutit siunissami eqquutsinneqartassapput

Ilumoortussaq Saammaasseqatigiinnissarlu pillugit isumalioqatigiissitap nalunaarusiani Ottawami persuarsiornartumik marlunngormat saqqummiummagu Inuit Tapiriit Kanatami siulittaasoq Terry Audla taama oqarpoq.

Isumalioqatigiissitap innersuussutai tamaasa tapersersorluinnarpavut, Terry Audla oqarpoq, nangillunilu:
- Kissaatigisarpulli tassaalluni New Foundlandimi aamma Paggivittami Nunatsiavummilu atuarfinni najugaqarfiutigisuni atuartuusimasut, nunap inoqqaavisa najugaqarfiutigisuni atuarfinni atuartuusimasutulli allatulli maannamiit pineqartariaqartut, Terry Audla oqarpoq.

Aamma atuaruk Inuit indianerillu meerartaat 4000-it Canadami kostskoliniitillutik toqusimapput

Maannamummi naggueqatigiit Inuit Paggivittamiittut, nunap inoqqaavisut allatulli atugarliortitaasimanerat suli akuerineqanngilaq, ilaatigullu taarsiisoqarnissaanik  isumaqatigiissutini ilaatinneqaratik.

Terry Audla oqalugiaammini ilaatigut aamma imaoqarpoq.

- Naggueqatigiit Inuit nunagisamut oqartussaanerminnik isumaqatigiissutaanni neriorsuutit ilaatinneqartut atuutsinneqarnissaat ilaatinneqarnissaallu, Canadami qitiusumik naalakkersuisunut nunallu immikkoortuini naalakkersuisunut kajumissaarutigaarput.  

Nunasiaateqarneq sioqqullugu inuulluataarnitta namminersortuunittalu utertinneqarnissaat isumaqatigiissutini siunertaagaluarput, tamakkuli eqquutsinneqarsimanngillat.
Neriorsuutit tamakkua meerartatsinnut ernuttatsinnullu eqquutsinneqartariaqarput, Terry Audla naggasiivoq.