PITUFFIK Namminersorlutik Oqartussat Pituffik pillugu suliamut mianersoqquneqarsimapput
Pituffimmi sullissisussarsiornissap matuneqarnissaa qaammatinik qulinik sioqqullugu, novembarip arfineq aappaanni 2013, Nunanut allanut tunngasunut ministereqarfik, Nunatta Danmarkimi sinniisoqarfia Namminersorlutillu Oqartussat nunanut allanut allaffeqarfia, Greenland Contractors Pituffimmi sullissinissamik neqerooruteqarpat ajornartorsiutinik pilersoqarsinnaaneranik USA-p mianersoqquai.
Nunanut allanut tunngasunut ministereqarfimmi KNR-ip pappialanik takunnissinnaatitaanerata tamanna qulaarpaa.
Aamma atuaruk Tusagassiuut: USA-p Pituffik pillugu akerleriinnermi Danmark itigartippaa
Amerikamiut Danmarkimi aallartitaqarfiani atorfillip qarasaasiatigut allakkami, danskit kalaallillu qaffasissumik atorfilittaat mianersoqquai, soqutigisatigut aporaattoqalersinnaasoq, suliffeqarfik Greenland Contractors USA-p sullissisussarsiorneranut qinnuteqaateqassappat.
Københavnimi CBS-imi inatsisinut professori allakkat atuareerlugit ima naliliivoq:
- Ajornartorsiut una pineqarpoq: amerikamiut malittarisassaat atuleraanni, taava aalajangersakkat aalajangersimasut soqutigisanik aporaatitsilersinnaasut, allakkami unnersuussutigineqarput.
Aamma atuaruk Qujaukitsoq: Hammondip Pituffik pillugu suliami qanoq akuutigisimanera misissorneqassaaq
Akerleriissuteqarsinnaaneq uaniippoq: Greenland Contractorsimi aningaasat nalillit pingajorarterutaat Namminersorlutik Oqartussanit pigineqarnerat, USA-p neqerooruteqarnissaata ilusilersornissaannut peqatiserineqarlutik Namminersorlutik Oqartussat qaaqquneqarsimapput.
Tamanna USA-mi tuniniaanermi malittarisassanik unioqqutitsineruvoq.
Suliffeqarfimmik sullissisussarsiornermi peqataasumut Namminersorlutik Oqartussat piginneqataammata eqiingaffigineqartariaqartoq oqaatigineqarpoq. Taamaalisoqartillugu amerikamiut tuniniaanermi malittarisassaat immikkut ittut atuuttarput. Ilaatigut soqutigisat aporaannerat pillugu nalunaarusiortoqassalluni.
Taamaattumik USA inatsisitigut nalunaarusiamik piumasaqarpoq, tassani ersersinneqassammat Greenland Contractors aamma Namminersorlutik Oqartussat akornanni ingasattumik qanippallaamik suleqatigiittoqanngitsoq.
Aamma atuaruk Suliariumannittussarsiuussinermut malittarisassat nutaat Namminersorlutik Oqartussat akuerisimavaat
Sullissisussarsiornerup matunnginnerani nalunaarusiassap taassuma suliarinissaa angumeriuminaassinnaasoq, USA allakkamini nalunaarpoq.
Sullissisussarsiornermi piffissarititaasoq killeqarmat, nalunaarusiornissarlu killissarititaasup iluani angumerinngikkaanni, piginneqatigiiffik nalunaarusiunngitsoornini pissutigalugu mattunneqassammat allakkami ilisimatitsissutigineqarpoq.
Nunanut allanut tunngasunut ministereqarfimmiit Nunanullu allanut tunngasunut pisortaqarfimmiit Nuummiittumiit KNR oqaaseqartitsiniarluni utaqqivoq. Pisortaqarfiit USA-p mianersoqqussutaanut qanoq qisuariariaateqarsimanersut tusarusussimagaluarparput.
