VIDEO Qujaukitsoq: Hammondip Pituffik pillugu suliami qanoq akuutigisimanera misissorneqassaaq

Suliami Greenland Contractorsip amerikamiut Pituffimmi sakkutooqarfianni sullissinissamut isumaqatigiissuteqanngitsoornerani Naalakkersuisut tamanikkut siulittaasuat aamma nunanut allanut tunngasunut naalakkersuisuusoq, Aleqa Hammond, qanoq akuutigisimava?
marsip 02-at 2015 18:07

Apeqqut taanna naalakkersuisut maanna misissuititsiniarneranni qulaajagassanut ilaassasoq, nunanut allanut tunngasunut naalakkersuisoq, Vittus Qujaukitsoq, KNR-imut tallimanngormat oqarpoq.

- Pituffimmut tunngatillugu suliariumannittussarsiuussinermut suliaq tamakkiisumik qulaajaaffigitinniarlugu Naalakkersuisuniit suliamik aallartitsigatta ilaatigut attaveqarneq pisortaqarfiit akornanni aammalu qinikkat akornanni qanoq anertutigisunmik suliarineqartarsimasut, kikkunnut, qanga qanorlu apuussisoqartarsimanersoq ilaatigut qulaajaaffigisussaallugu, Vittus Qujaukitsoq KNR-imut oqarpoq.

Misissuisitsinissaq sumorpiaq tunngasuussanersoq, kikkut suliarissaneraat qaqugulu naammassineqassanersoq naalakkersuisunit pisortatigoortumik suli nalunaarutigineqanngilaq.

Paassissutissaminernilli agguaassisoqartarpoq.

Aamma atuaruk Vittus: Naalakkersuisuusimasut Pituffik pillugu oqallittarsimanngillat

Tassami Naalakkersuisut siulittaasuata naalakkersuisoqarfiani qanittoq ilanngullugu pisortaq, Svend Hardenberg AG-mut februaarip aqqarnani oqarpoq, Kim Kielsenip naalakkersuisut tamakkiisut ilisimatissimagai, uani suliami sunik qanorlu pisoqarsimaneranik misissuisussamik Danmarkimi eqqartuussissuserisoqarfimmik suliakkiisimalluni.

Svend Hardenberg AG-imut aamma oqarpoq, Pituffimmi suliariumannittussarsiornissami kalaallut qallunaallu piumasaqaatissaat Naalakkersuisunut tamakkiisunut saqqummiunneqarsimanngitsut.

Aamma taamani naalakkersuisuusut siulittaasuat Aleqa Hammond sulianik tamakkuninnga saqqummiivigineqarsimanersoq saqqummiivigineqarsimannginnersorluunniit, Svend Hardenbergip oqaatigisinnaannginnerarpaa.

Aamma atuaruk Suliariumannittussarsiuussinermut malittarisassat nutaat Namminersorlutik Oqartussat akuerisimavaat

Kisianni tamanna nunanut allanut tunngasunut pisortaqarfiup pisortaanit iluatungilerneqarpoq.

- Suliffeqarfiup kalaallinit danskinilluunniit pigineqarnissaannut tunngasortaasa isumaqatigiinniutigieqarnerat Naalakkersusut siulittasuata naalakkersuisoqarfianit nunanullu allanut tunngasunut pisortaqarfimmit oqaasertalersorneqarput, Inuussutissarsornermut aatsitassanullu naalakekersuisoqarfimmit taavalu akileraartarnermut aqutsisoqarfimmit tapertalerneqarlutik,  nunanut allanut tunngasunut pisortaqarfiup pisortaanit Kai Holst Andersen AG-mut allappoq.

Tassalu Naalakkersuisut siulittasorisimasaat qanoq akuutigisimeranut akuunngitsigisimaneranullu paasissutissat imminnut aporaattut maanna misissuiffigineqassapput.

- Nunanut allanut naalakkersuisuusoq taamanikkut naalakkersuisut siulittaasuattut inissisimavoq. atassumalu qanoq annertutigisumik soorunami sulianut akuusimanera ilanngullugu qujlaajagassat ilagaat, Vittus Qujaukisoq oqarpoq.

Pituffik pillugu suliaq pillugu nutaarsiassat allat uani atuarsinnaavatit. Uanilu.