Inatsisartuni ataatsimiititaliaq Pituffimmut tunngatillugu Vittus Qujaukitsumut tunuliaqutsiivoq
Danskit kalaallillu suliffeqarfiisa pingasut Pituffimmi sakkutooqarfimmi kiffartuussinissamik isumaqatigiissutip annaaneqarneranut tunngatillugu Danmarkip USA-llu akornanni illersornissamik isumaqatigiissummut tamatuma naapertuutinnginneranik naammagittaalliuutaasa amerikami oqartussaasut naammagittaalliuteqartarfiata itigartitsinerata kingorna, ataatsimiititaliap ippassaq ualikkut ataatsimeereernermini tusagassiorfinnut nalunaarutaani tamanna atuarneqarsinnaavoq.
AAMMA ATUARUK Pituffik pillugu killiffik ilungersunartutut Naalakkersuisut isigaat
Nunanut Allanut Sillimaniarnermullu Ataatsimiititaliaq nunatsinniillu folketingimut ilaasortaatitat Naalakkersuisut danskillu nunanut allanut tunngasunut ministeriata oqaloqatigiissimanerinik ilisimatinneqarput immikkuualuttut tikillugit erseqqissaataasunillu apeqquteqartarnissaminnut periarfissinneqarlutik.
Ataatsimiititaliap danskit nunattalu naalakkersuisuisa USA-mut isumaqatigiinniaqqinnissaannik tunuliaqutsiinerata saniatigut, ataatsimiititaliaq isumaqarpoq apeqqummi taama inuiaqatigiinnut kalaallinut pingaaruteqartigisumi Naalakkersuisut inatsisartullu ataatsimiititaliaata qanilluinnartumik suleqatigiissinnaanerat pingaaruteqartorujussuusoq, taamatullu aamma assut nuannaarutissaasoq nunarput Danmarkilu tamakkiisumik isumaqatigiimmata suleqatigiissallutik suliassarlu USA-mi naalakkersuinikkut oqartussanut qullerpaanut anngullugu.
AAMMA ATUARUK Lidegaard: Isumaqatigiinniaqqinnissaq ilimananngilaq
Peqatigitillugu ataatsimiititaliap erseqqissarpaa suliaq maanga uninngimmat, ataatsimiititaliallu suliaq malersortuarniarmagu, qilanaaralugulu Nunanut allanut Naalakkersuisumik amerlanerusunik ilisimateqatigiiffiusunik ataatsimeeqateqartarnissani suliap tamakkiisumik qulaajarneqarnissaa siunertaralugu.
