Naalakkersuisunngortitsinissaq ullulerneqarallarpoq
Naalakkersuisunngortitsiniarluni isumaqatigiinniarnerit assortuunnertaqaratik ingerlassappata Decembarip aqqaneq aappaani Naalakkersuisunngortitsisoqarsinnaavoq. Inatsisartut Siulittaasorigallagaata Lars-Emil Johansenip taama ilimasulluni oqarpoq.
Nunatta aningaasaqarnera annanniarlugu immikkut ittumik iliuuseqartariaqarsorinngilaa, aningaasaliissutinut inatsisip atuuttup sivitsoqqinnissaata saniatigut.
Ingerlatsigallarneq ukiap tungaanut
- Nangaanarsinnaasut tamaasa eqqarsaatigalugit ilimagisinnaavara Naalakkersuisut siulittaasuannik, Inatsisartut siulittaasoqarfianiiittussanik nutaanik inatsisartullu aaqqissuunneri nutaat tallimanngornermi taaneqassasut, aningaasaliissutinut inatsisip atuuttup sivitsoqqinnissaanut ullut ataasinngorneq imaluunniit marlunngorneq atorneqarsinnaapput, Lars-Emil Johansen oqarpoq KNR-mut taama oqarpoq.
Aningaasaliissutinut inatsit Inatsisartuni immikkut ittumik ataatsimiittoqarneranni sivitsorneqassaaq. Inatsisartut ataatsimiinnissaata tulliata tungaanut Nunatta aningaasaqarnikkut ingerlaannarnissaa ilasinerup qulakkiissavaa, Inatsisartut siulittaasorigallagaata oqaatigaa tamanna siusinnerpaamik februarip naanerani aallartinneqassasoq.
Aamma atuaruk Vittus tulluusimaanngilaq
Naalakkersuisoqarfiillu maanna aningaasaliissutinut inatsisaagallartoq ingerlappaat, aappaagumut aningasaaqarnermut inatsisut ukiaanerani ataatsimiinnermi suliarineqartuaannarmat, tamannalu ukiormanna qinersineq pillugu kinguartinnikuulluni. Aappaagu "Ukiumi ataatsimiinnermi" Inatsisartut ukiormannamut aningaasaqarnermut inatsit aatsaat akuersissutigisinnaavaat.
Nunatta aningaasaqarnera amigartooruteqarfiunera ilisimaneqalermat qinigaasut nutaat immikkut ittumik iliuuseqarnissaat pisariaqalernissaa ilimagaajuk?
- Naamik takorloorsinnaanngilara. Isumaqarpunga aningaasanut inatsisaagallartup ilaannarnissaa naammattoq, Lars-Emil Johansen oqarpoq.
2009-mi matussusiisariaqarsimaneq
Oqaluttuarisinnaavarput Naalakkersuisuusimasut aasami 2009-mi ivertinneqaqqammerlutik suliartujaarlutik immikkut ittumik Inatsisartuni ataatsimiittariaqarnikuupput, Royal Greenlandimut 500 million koruuninik nunatta karsianiit nassaarniartariaqarnikuugamik. Royal Greenlandimi amigartoorujussuarneq matussusernissaa pisariaqavissimammat.
Oqaatigeriikkatsitut decembarip aqqaneq aappaani Inatsisartut siulittaasorigallagaata ilimagaa Naalakkersuisunngortitsisoqarnissaa, ataasinngornermilu immikkut ittumik ataatsimiittoqarsinnaassalluni.
Ataatsimiissat akornanni sapaatip akunnerata naanerani inatsisartunngorlaat pikkorissartinneqassasut inatsisartut siulittaasuata ilimagaa.
