Siumut aamma IA: Suleqatigiissutissanik ulikkaarpugut
Inuit Ataqatigiit siulittaasuata, Sara Olsvigip illoqarfiit anginerit sisamat ineriartortinneqarnissaat kisiat pinnagu, Nunatta tamakkerlugu ineriartortinneqarnissaa Siumumut aamma suleqatigiinnissutigaa.
Siumullu siulittaasuata Kim Kielsenip eqqaamaqquaa, Inuit Ataqatigiit Siumullu kisimik partiiunngimmata, partiit allat aamma suleqatiserineqartariaqartut oqaatigalugu.
- Qinersinerup kingorna partiit IA aamma Siumup kisimiillutik suleqatigiissanngillat, partiit allat aamma kivitseqataasariaqarput, Kim Kielsen oqarpoq.
Peqqissaartumik isumaqatigiinniarneq
Inuit Ataqatigiit siulittaasuata suut suleqatigiissutigineqarsinnaasut Siumumut allakkatigut nassiunneqartut pillugit ima oqarpoq.
- Nunaqarfiit illoqarfiillu tamaasa ineriartortilluarnissaat, aningaasarsiornikkut ineriartortitsineq, aatsitassarsiornikkut ineriartortitsinissaq, aalisarnikkut aqqissuusseqqinnissaq taamatullu tamanna eqqarsaatigalugu aalisartut ulluinnarni atugaasa pitsaanerulersinnissaat tamatta anguniagarput suleqatigiissutigisinnaasatut, Siumut saaffigaarput, Sara Olsvig oqarpoq.
Oqallinnermi aqutsisup, Stina Skiftep Siumup siulittaasua, Kim Kielsen aperaa, Inuit Ataqatigiillu suleqatigiissinnaanerinut Siumup allagaa qanoq imaqarnersoq, Kim Kielsenilu siullermik illarluni quiasaaralunilu ima akivoq.
- Asasara Inuit Ataqatigiit...Naamik taamaanngilaq. Taama quiasaarilaariarluni Kim Kielsen ilumoorsaarnerulluni ima nangilluni oqarpoq.
- Siumumit partiit tamaasa suleqatigisinnaanerinut ammajuarpugut. Kisianni novembarip 28-at utaqqimaalaariartigu qinersisartullu qanoq isumaqarnersut utaqqimaalaariartigu, maannakkut suna tamaat pilersaarusiorpallaarnagu. Qinersisartut oqariartuutaat tusareerutsigu taava suleqatigiinnissap anersaava aallaavigalugu partiit tamattaalluta naapeqatigiinnissaq pissaaq.
KNR-kkut oqallinnerit unnugu nangillugit, qinersisartut periarfissinneqassapput politikerinut apeqquteqarsinnaanerminnik. Apeqqutiginiakkat KNR-ip facebookianut allanneqarsinnaapput, taakkulu malillugit politikerit oqallitsinneqassallutik. Kalaallit aallakaatitsineq aallartissaaq unnugu nalunaaqutaq arfineq pingasup qeqqanut, danskisullu aallartissalluni nalunaaqutaq quligiluap qeqqanut.
