Partii Inuit kommunenut 18nut uteqqinnissaaq qineqqusaarutigaat

Partii Inuit inatsartunut qinersinissamut qineqqusaarutitik qinigassanngortitamilllu aqqi saqqummiuppaat. Kommunerujussuit sisamanngorlugit aaqqiissimaneq qimallugu kommuunit 18-nngorteqqinneqarnissaat partiip pingaarnertut qineqqusaarutigaa. Taava aamma Naalakkersuisut siulittaasuata oqartussaaffii ikilisikkumavaat.
Allattoq Jaaku Lyberth
novembarip 04-at 2014 17:56

Nunanut allanut tunngasunut nunanillu aallani niueqateqarnermut naalakkersuisoqarfimmik immikkut pilersitsinissaq qineqqusaarnermi pingaartaasa ilagaat.

Kommunit kattussuunneqarnerisigut oqartussaaffiit ungasillisimasut, Partii Inuit isumaqarpoq. Taamaattumik nunatsinni illoqarfiit 18i-t kommuninngortinneqarnerisigut peqqinnarnerussasoq, Partiip siuliuttaasuata Nikku Olsen naliliivoq.

- Uagut isumaqarput malillugu tamanna  peqqinnarnerpaavoq aamma inuit paasiartulersimavaat soorlu assersuutigalugu tunumi aamma Maniitsormiut  assersuutissaqqipput,  taakkua oqartussaaffik pigisimasartik  peqqinnartoq utertikkusuppaat, periarfissallu tamakkua mattutiinnarnagit  oqaloqataaffigisariaqaripput, nunarput peqqissumik  ingerlateqqinneqalissappat, Nikku Olsen oqarpoq.

Naalakkersuisut siulittaasuata oqartussaaffii ikilisinneqartariaqartut, Partii Inuit isumaqarput.
Nunanut allanut tunngasunut aamma nunanik allanik niueqaetqarnermut naalakkersuisoqarfimmik pilersirsinissaq pisariaqartoq, Nikku  Olsen isumaqarpoq, suliat taakkua pissutigalugit Naalakkersuisut siulittaasui sivisuumik nunanut aallanut angalasariaqartarmata.


- Nunarput niuernikkut niueqatigiinnikkullu  eqaannerujussuarmik aqqutissiuunneqarsinnaasoq isumaqarpugut, tulluartuusorlu nunanut allanut niuqateqarsinnaanermut nunanut allanut naalakkersuisuutigaluni  suliassanik taakkuninnga tigusisinnaappat taava eqaannerungaartumik qulakkeerneqassaaq, Partii Inuit siullittaasuat Nikku Olsen oqarpoq.

Partii Inuit inatsisartunut qinigassanngortitai 13-iupput. Siorna qinigassanngortitat
quliupput marlullu inatsisartunut qinigaallutik.

Partii Inuit inatsisartunut qinigassanngortitaat ukuupput:

Pauline Mølgaard                  Qeqertarsuaq    
Georg Olsen                         Qeqertarsuaq
Randi Broberg                      Qeqertarsuaq
Nikku Olsen                           Ilulissat
Piitannguaq Alaufesen          Ilulissat
Pâviârak Jakobsen                Aasiaat
Godmand Rasmussen          Sisimiut
Joel Petersen                        Sisimiut
Terto Ngiviju                          Nuuk
Petrine Høegh                       Nuuk
Ane Petersen                        Narsaq
Adolf Kristiansen                   Tasiilaq
Lars Bianco Mikaelsen          Tasiilaq