Jette Bangip inuunera sulineralu pillugit atuagaq nutaaq
Jette Bang ukioq 1936-imi 22-nik ukioqarluni siullerpaamik nunatsinnukarpoq, taamani assiliisartutut ilinniarnini naammasseqqammerpaa. Nunatsinnukarpoq nunatsinni ulluinnarni inuuneq assilissatigut takussutissarsiniarlugu.
Jette Bang inuunini naallugu Kalaallit Nunaannut soqutiginnippoq, matumalu kinguneraa Kalaallit Nunaani assilissat 1000-it sinneqartut qaqutigoortut assilisimagamigit.
Jette Bang 1936-mit 1961 tikillugu nunatsinni angalavoq. 1964-imi 50-iinnarnik ukioqarluni toquvoq.
Jette Bangip assilisai amerlanerit nunatsinni assilisaapput - Kalaallit Nunaanni ulluinnarni pisunit assilisat, soorlu meeqqat, arnat, sulisartut, piniartut aalisartullu assilineqarsimapput. Assilisai qaqutigoortuupput sakkortuumik qanilaassuseqarlutik. Jette Bang assiliisarsimavoq nunamut inuinullu annertuumik nuannaartitsilluni asannissuseqarlunilu.
Jette Bang pillugu atukkiaq kusanarluinnartunik assitaqartoq Leise Johnsenimit suliarineqarpoq. Leise Johnsen Nunani Avannarlerni Piorsarsimassutsikkut Attaveqaammi NAPA-mi pisortaasimavoq.
Assilissat 85-it toqqarsimavai taakkua atuakkami angisuunngorlugit nuutsinneqarput 200-nillu qupperneqarluni. Atuagaq kalaallisut, qallunaatut tuluttullu allataavoq, Jette Bangip inuunera sulineralu pillugit allaataallutik.
Atuakkap saqqummersinneqarnera atuakkanik saqqummersitsisarfimmit Milik Publishingimit isumagineqarpoq.
Atuakkap saqqummersinneqarnera Nuummi Kulturikkut illorsuarmi Katuami ualeru malunnartinneqassaaq, unnugulu arfineq marlunut Leise Johnsen Jette Bang pillugu oqalugiassaaq, Katuami Ikinngutigiinnerup inaani.
