Nunavut Filippinerinut aningaasanik tunissuteqarpoq
Nunavummi naalakkersuisut siulittaasuattut suliami kingullersaasa ilaattut Eva Aariap aningaasat katersat Canadami Røde Korsimut sapaatip-akunnerata massuma ingerlanerani tunniuppai, Nunavummi naalakkersuisut siulittaasoriligaannut Peter Taptunamut tunniukkamigit.
Checki Canadamiut dollariinik 25.000-it dollarinik aningaasartaqarpoq, tassa 130.000-it koruunit missaannik aningaasartaqarluni.
Nunavummi naalakkersuisut aningaasat taakku marloriaatinngortinngortinneqarnissaat aalajangerpaat, Nunavullu Filippinerinut tassa 260.000-it koruunit missaannik tunissuteqassaaq.
Nunavummi nunaqarfinni assigiinngitsutigut aamma ikiorsiiniartoqarpoq, filminik takutitsinermi isertitat, namminerlu kaageeralianik tunisinermi isertitat aqqutigalugit tunissuteqartoqarluni.
Iqalunni aningaasanik katersuiniarluni sapaatip-akunnerata naanerani pisussamut aamma pilersaarusiortoqarsimavoq.
Maani Naalakkersuisut Filippinerimiut aningaasatigut ikiorsiinatik, Filippinerini eqqugaasunut misiginneqataassutertik Filippinerit Danmarkimi aallartitaqarfiannut tunniuppaat.
Kalaallilli Røde Korsiat 100.000-it koruuninik tunissuteqarpoq, soorlu aamma Nuummi neriniartarfik Bones arfininngormat aaqqissuussamik iliuuseqarpoq, ulloq taanna isertitat Filippinerimiunut tunissutigineqarlutik.
Kiattup anorersuarujussuanit Haiyanimit Filipppinerini eqqorneqartut katillugit 67.000-it koruuninik neriniartarfimmit ikiorserneqartut, neriniartarfiup pisortaata Erik Brogaardip Radioaviisimut ullaaq manna ilisimatitsissutigaa.
Neriniartarfik taanna Filippinerimiunik amerlasuunik sulisoqarpoq, neriniartarfiullu ulloq taanna siertitaasa saniatigut sulisut akissarsiaat Filippinerimiunut tunniunneqarnissaat, Bonesimi sulisut siunnersuutigisimavaat.