Saamerliit kalaallinut qineqqusaarput
Københavnimi Kalaallit Illuutaanni ualeru aaqqissuussisoqassaaq, saamerlernik naalakkersuisunngortoqassagaluarpat kalaallit Danmarkimi najugallit taakkunannga qanoq iliorfigineqarsinnaanerat pillugu oqallitsitsisoqassalluni.
Oqallittussat nutaaginnangajaapput, SF-ip qinigassanngortitaa kisimi ilisarnarluni.
SF-imeersoq tassaavoq inunnik isumaginninnermut- tarnillu pissusaa pillugu oqaaseqartartoq, Özlem Sara Cekic, Folketingimi 2007-imili ilaasortaalersoq. Socialdemokratiniit qinigassanngortittoq nutaajuvoq, tassaalluni Ikram Sawar, Radikaliniillu qinigassanngortittoq aamma nutaajuvoq, tassaalluni Mette Annelie Rasmussen, aamma Enhedslistemiit Pia Boisen.
Naalakkersuisunut ilaasortaasimasoq, Marianne Jensen, aaqqissuussinissamut isumassarsisuuvoq, namminerlu aqutsisuussalluni.
Kalaallit Illuutaata erseqqissaatigaa namminneq aaqqissuussarinngikkitsik, talerperliuniallugooq assinganik aaqqissuussiniarlutik inimik atorniassagaluarpata tikilluaqqusaanerarpaat.
